લંડન, તા. ૬ : ઈંગ્લેન્ડના પ્રવાસે ગયેલી પાકિસ્તાન ક્રિકેટ ટીમના કેટલાક ખેલાડીઓના મોબાઇલ પાકિસ્તાન ક્રિકેટ બોર્ડે તપાસ માટે પોતાના કબજામાં લીધા હોવાના અહેવાલે ક્રિકેટ જગતમાં ભારે ખળભળાટ મચાવ્યો છે. બોર્ડે કયા ખેલાડીઓના મોબાઇલ જપ્ત કર્યા છે અને તપાસનો ચોક્કસ વિષય શું છે તેની સત્તાવાર જાહેરાત કરી નથી.

ક્રિકેટમાં ભ્રષ્ટાચાર, મેચ ગોઠવણ અથવા શંકાસ્પદ વ્યક્તિઓ સાથેના સંપર્ક જેવી અસાધારણ પરિસ્થિતિમાં જ ખેલાડીના મોબાઇલની તપાસ થતી હોવાથી અનેક અટકળો શરૂ થઈ છે. જોકે હાલ કોઈ ખેલાડી સામે મેચ ગોઠવણનો આરોપ સાબિત થયો નથી અને બોર્ડ તરફથી ભ્રષ્ટાચારની તપાસ ચાલી રહી હોવાની પણ પુષ્ટિ કરવામાં આવી નથી.

ઈંગ્લેન્ડ સામેની ત્રણ ટેસ્ટની શ્રેણીમાં પાકિસ્તાન પ્રથમ બે મુકાબલા હારી ચૂક્યું છે. લોર્ડ્સમાં મળેલી ૧૯૪ રનની હાર બાદ ઈંગ્લેન્ડે શ્રેણીમાં ૨-૦ની અજેય સરસાઈ મેળવી હતી. એજબેસ્ટન ખાતેની ત્રીજી અને અંતિમ ટેસ્ટ પૂર્ણ થાય ત્યાં સુધી મોબાઇલ બોર્ડના કબજામાં રહેવાની માહિતી છે. સમગ્ર મામલે સત્તાવાર સ્પષ્ટતાની રાહ જોવાઈ રહી છે.