નવી દિલ્હી : સંઘર્ષ અને કઠિન પરિશ્રમથી ૨૦૨૬ આઈપીએફ વર્લ્ડ સબ-જુનિયર અને જુનિયર ક્લાસિક પાવરલિફ્ટિંગ ચેમ્પિયનશિપમાં પોતાના શરીરના વજન કરતા ત્રણ ગણું એટલે કે ૧૪૦ કિલોગ્રામ જંગી વજન ઉપાડીને ભારત માટે સિલ્વર મેડલ જીતનારી યુવા પાવરલિફ્ટર કેયા બેનર્જી તાજેતરમાં ઇન્ટરનેટ પર ઓનલાઈન દુર્વ્યવહાર અને આર્ટિફિશિયલ ઇન્ટેલિજન્સ (AI) ના દુરુપયોગનો ભોગ બનતાં સમગ્ર રમતગમત જગતમાં ચિંતાનું મોજું ફરી વળ્યું છે.

પોતાની ઐતિહાસિક સિદ્ધિ બાદ સોશિયલ મીડિયા પર અચાનક લોકપ્રિયતા મેળવનાર કેયા બેનર્જીએ પોતાની ઇન્સ્ટાગ્રામ સ્ટોરીઝ દ્વારા દર્દનાક ખુલાસો કરતા જણાવ્યું હતું કે, તેની આ ખુશી ત્યારે ફીકી પડી ગઈ જ્યારે તેને ફેસબુક અને ઇન્સ્ટાગ્રામ જેવા પ્લેટફોર્મ્સ પર જાતીય સતામણી, તેના નામથી બનતા ફેક એકાઉન્ટ્સ તેમજ તેની વંશીયતાને લગતી અશોભનીય વાતોનો સામનો કરવો પડ્યો હતો.

આ મામલે વધુ વિગત આપતા કેયાએ ઇન્સ્ટાગ્રામ પર પોતાના દર્દને વાચા આપતા લખ્યું હતું કે, "સૌથી ખરાબ બાબત એ છે કે હજારો AI ટૂલ્સે મારા ચહેરા અને શરીરનો દુરુપયોગ કરીને અત્યંત ખલેલ પહોંચાડતી નકલી તસવીરો જનરેટ કરી છે, અને રોજ સવારે ઉઠીને મારા સોશિયલ મીડિયા ફીડ પર આ પ્રકારની મોર્ફ કરેલી તસવીરો જોવી મારા માટે અત્યંત માનસિક અસ્વસ્થતાભર્યું બની ગયું છે."

આ ઘટના બાદ મહિલા ખેલાડીઓની સાયબર સુરક્ષા અને સોશિયલ મીડિયા પર વધતા જતાં AI ના નકારાત્મક ઉપયોગ સામે કાયદાકીય કડકાઈ લાવવાની માંગ જોર પકડી રહી છે, ત્યારે સાયબર સેલ અને સંબંધિત પ્લેટફોર્મ્સ દ્વારા આ પ્રકારના ફેક એકાઉન્ટ્સ અને ડીપફેક જનરેટર્સ સામે કડક તપાસ હાથ ધરીને યોગ્ય પગલાં લેવામાં આવે તેવી પ્રબળ સંભાવના છે.