શ્રીનગર, તા.૧૭: વેસ્ટ ઈન્ડિઝ સામેની વન-ડે શ્રેણી માટે ભારતીય ટીમમાં સ્થાન મેળવવામાં નિષ્ફળ રહેલા વિસ્ફોટક વિકેટકીપર-બેટ્સમેન રિષભ પંત હવે ઈરાની કપમાં પોતાનું કૌવત બતાવવા તૈયાર છે. આગામી ઈરાની કપ મેચ માટે રિષભ પંતને 'રેસ્ટ ઓફ ઈન્ડિયા' (Rest of India) ટીમનો કેપ્ટન બનાવવામાં આવ્યો છે. આ હાઈ-વોલ્ટેજ મેચ ૨૦૨૫-૨૬ ની રણજી ટ્રોફી ચેમ્પિયન જમ્મુ-કાશ્મીરની ટીમ સામે રમાશે. યુવા બેટ્સમેન સરફરાઝ ખાનને ટીમનો વાઈસ-કેપ્ટન (ઉપ-કેપ્ટન) બનાવવામાં આવ્યો છે.

આ મેચની સૌથી ખાસ વાત એ પણ છે કે પીઠના નીચેના ભાગમાં 'સ્ટ્રેસ ઈન્જરી'ને કારણે લાંબા સમયથી ક્રિકેટથી દૂર રહેલો ફાસ્ટ બોલર આકાશ દીપ ફિટનેસ ટેસ્ટ પાસ કર્યા બાદ ટીમમાં વાપસી કરવા જઈ રહ્યો છે. આકાશ દીપે ફેબ્રુઆરી ૨૦૨૬ માં રણજી ટ્રોફીમાં પોતાની છેલ્લી મેચ રમી હતી. ટીમમાં પેસ એટેકની જવાબદારી મુકેશ કુમાર, મુકેશ ચૌધરી અને આર્યન પાંડે સંભાળશે, જ્યારે સ્પિન એટેકમાં માનવ સુથાર, સારાંશ જૈન અને અનુકુલ રોય જેવા યુવા બોલરોને સ્થાન મળ્યું છે.

રણજી ટ્રોફીમાં શાનદાર પ્રદર્શન કરનારા ટોચના બેટ્સમેનો આર. સ્મરણ અને આયુષ ડોસેજા પણ આ રોસ્ટરનો ભાગ બન્યા છે. જમ્મુ-કાશ્મીર અને 'રેસ્ટ ઓફ ઈન્ડિયા' વચ્ચે આ પાંચ દિવસીય મુકાબલો ૧ થી ૫ ઓક્ટોબર દરમિયાન શ્રીનગરના ઐતિહાસિક શેર-એ-કાશ્મીર સ્ટેડિયમ ખાતે ખેલાશે.

'રેસ્ટ ઓફ ઈન્ડિયા' ટીમ:
રિષભ પંત (કેપ્ટન, વિકેટકીપર), સનત સાંગવાન, શિખર મોહન, સુદીપ ઘરામી, સરફરાઝ ખાન (વાઈસ-કેપ્ટન), સ્મરણ રવિચંદ્રન, માનવ સુથાર, સારાંશ જૈન, આકાશ દીપ*, મુકેશ કુમાર, મુકેશ ચૌધરી, આર્યન જુયાલ (વિકેટકીપર), આર્યન પાંડે, અનુકુલ રોય, આયુષ ડોસેજા. (*ફિટનેસને આધીન)