નવી દિલ્હી, તા.૨૯: ટીમ ઈન્ડિયાના પૂર્વ કેપ્ટન અને રન મશીન વિરાટ કોહલીએ વન-ડે ક્રિકેટમાં ૧૫,૦૦૦ રનનો ઐતિહાસિક આંકડો પાર કરવા સાથે જ એક અનોખી ચર્ચા જગાવી છે. વેસ્ટ ઈન્ડિઝ સામેની વન-ડે શ્રેણી દરમિયાન કિંગ કોહલીએ ક્રિકેટ ઈતિહાસના સાત મહાન ખેલાડીઓની વિવિધ શૉટ્સ અને કુશળતાઓને એકત્રિત કરીને પોતાના મતે એક 'આદર્શ' (Perfect) વન-ડે બેટ્સમેનનું ચિત્ર રજૂ કર્યું છે. સ્ટાર સ્પોર્ટ્સ દ્વારા શેર કરવામાં આવેલા આ રસપ્રદ વિડીયોએ સોશિયલ મીડિયા પર ચાહકો વચ્ચે ભારે કુતૂહલ અને ચર્ચા સર્જી છે.

દિગ્ગજ ખેલાડીઓ અને તેમના 'સિગ્નેચર' શૉટ્સનું ડ્રીમ કોમ્બિનેશન

૩૭ વર્ષીય વિરાટ કોહલીએ પોતાના 'ડ્રીમ ODI બેટર'નું નિર્માણ કરતી વખતે બાળપણના આદર્શ સચિન તેંડુલકરની આઇકોનિક 'સ્ટ્રેટ ડ્રાઈવ' ને સર્વોચ્ચ સ્થાન આપ્યું હતું. ત્યારબાદ તેણે શ્રીલંકાના પૂર્વ કેપ્ટન કુમાર સંગાકારાની શાનદાર 'કવર ડ્રાઈવ' ની પસંદગી કરી હતી. ભારતીય ક્રિકેટના 'ધ વોલ' ગણાતા રાહુલ દ્રવિડના મનમોહક 'ફ્લિક શૉટ' અને વિસ્ફોટક ઓપનર વીરેન્દ્ર સેહવાગના ઘાતક 'કટ શૉટ' નો પોતાના આદર્શ બેટરમાં સમાવેશ કર્યો હતો.

આ ઉપરાંત, સ્પિનરો સામે વર્ચસ્વ જમાવવા માટે ઓસ્ટ્રેલિયાના પૂર્વ ઓપનર મેથ્યુ હેડનના 'સ્વીપ શૉટ' અને અંતિમ ઓવરોમાં તોફાની બેટિંગ માટે ક્રિસ ગેલની 'પાવર સિક્સ હિટિંગ' ને પસંદ કરી હતી. જ્યારે વિકેટો વચ્ચે અકલ્પનીય ઝડપથી રન ચોરાવવા (Running Between the Wickets) માટે તેણે રોયલ ચેલેન્જર્સ બેંગલુરુ (RCB) ના પોતાના પૂર્વ સાથીદાર અને દક્ષિણ આફ્રિકાના મિસ્ટર ૩૬૦ ડિગ્રી એબી ડી વિલિયર્સ પર પસંદગીનો કળશ ઢોળ્યો હતો.

વેસ્ટ ઈન્ડિઝ સામે ૧૩૯ રનની અણનમ ઈનિંગ સાથે વિરાટનો વટ

કોહલી હાલમાં વેસ્ટ ઈન્ડિઝ સામેની ODI શ્રેણીમાં ઉત્કૃષ્ટ ફોર્મમાં જોવા મળી રહ્યો છે. તિરુવનંતપુરમ ખાતે રમાયેલી શ્રેણીની પ્રથમ મેચમાં જ તેણે અણનમ ૧૩૯ રનની શાનદાર ઈનિંગ રમીને ભારતને ૮ વિકેટે ભવ્ય વિજય અપાવ્યો હતો અને વન-ડે ક્રિકેટમાં પોતાના ૧૫,૦૦૦ રન પૂર્ણ કર્યા હતા. T20I અને ટેસ્ટ ક્રિકેટમાંથી નિવૃત્તિ લીધા બાદ હવે તેનું સંપૂર્ણ ધ્યાન ૨૦૨૭ના વર્લ્ડ કપ પર કેન્દ્રિત છે. ટેસ્ટ નિવૃત્તિ બાદ રમેલી ૧૩ વન-ડે મેચોમાં કોહલીએ ૮૯.૯ ની જબરદસ્ત સરેરાશ અને ૧૧૨.૫૧ ના સ્ટ્રાઈક રેટથી ૪ સદી અને ૫ અડધી સદી સાથે ૮૯૯ રન ફટકારીને પોતાની શ્રેષ્ઠતા સાબિત કરી દીધી છે.