નવી દિલ્હી, તા.૦૫: ક્રિકેટની રમતમાં અનિશ્ચિતતાઓ વચ્ચે આંતરરાષ્ટ્રીય સ્તરે ભારતીય ટીમ માટે રમતા મહાનમાં મહાન બેટ્સમેન અને બોલરો પણ ક્યારેક એક પણ રન બનાવ્યા વિના પેવેલિયન પરત ફરતા હોય છે. તાજેતરમાં જાહેર થયેલા રેકોર્ડ્સ અનુસાર, ભારતીય આંતરરાષ્ટ્રીય ક્રિકેટના ઇતિહાસમાં સૌથી વધુ વખત શૂન્ય (ડક) પર આઉટ થનારા ટોપ-૫ ખેલાડીઓની યાદી સામે આવી છે, જેમાં પૂર્વ ઝડપી બોલર ઝહીર ખાન પ્રથમ સ્થાને છે જ્યારે ભારતના દિગ્ગજ બેટ્સમેન વિરાટ કોહલીનું નામ પણ આ ચોંકાવનારી યાદીમાં બીજા ક્રમે સ્થાન પામ્યું છે.

યાદીના આંકડા મુજબ પૂર્વ આંતરરાષ્ટ્રીય ફાસ્ટ બોલર ઝહીર ખાન પોતાના કારકિર્દી દરમિયાન કુલ ૪૩ વખત શૂન્ય પર આઉટ થઈને આ યાદીમાં સૌથી મોખરે છે. નીચલા ક્રમે બેટિંગ કરવા આવતા ઝહીર ખાને બોલિંગમાં અદ્ભુત પ્રદર્શન કર્યું હતું પરંતુ બેટિંગમાં ઘણી વાર ખાતું ખોલાવ્યા વિના આઉટ થવું પડ્યું હતું, જોકે તેમણે વર્ષ ૨૦૦૪માં બાંગ્લાદેશ સામે ૧૧મા નંબરે રમીને ૭૫ રનની યાદગાર ઇનિંગ્સ પણ રમી હતી.

આ યાદીમાં સૌથી ચોંકાવનારું નામ દિગ્ગજ બેટ્સમેન વિરાટ કોહલીનું છે, જેઓ અત્યાર સુધી આંતરરાષ્ટ્રીય ક્રિકેટમાં ૪૧ વખત શૂન્ય પર આઉટ થઈ ચૂક્યા છે. વિરાટ કોહલીના નામે આંતરરાષ્ટ્રીય ક્રિકેટમાં ૨૫,૦૦૦થી વધુ રન અને ૮૦થી વધુ સદીઓ નોંધાયેલી છે, છતાં ટેસ્ટ અને વન-ડે સહિતની મેચોમાં ૪૧ વખત ડક પર આઉટ થવાનો આંકડો ચાહકો માટે આશ્ચર્યજનક રહ્યો છે.

તે સિવાય ભારતના અનુભવી ઝડપી બોલર ઈશાંત શર્મા આ યાદીમાં ૪૦ વખત શૂન્ય પર આઉટ થઈને ત્રીજા સ્થાને રહ્યા છે. ઈશાંત શર્મા સામાન્ય રીતે ૮થી ૧૧ નંબર વચ્ચે બેટિંગમાં આવતા હતા અને તેમણે ટેસ્ટ ક્રિકેટમાં ભારત માટે ૩૦૦થી વધુ વિકેટો ઝડપીને અસાધારણ પ્રદર્શન કર્યું છે, જેથી તેમની બેટિંગ સરખામણીએ બોલિંગ ક્ષમતા હંમેશા ટીમ માટે નિર્ણાયક રહી છે.

ભારતના સ્ટાર ઓફ-સ્પિનર હરભજન સિંહ આંતરરાષ્ટ્રીય મેચોમાં ૩૭ વખત શૂન્ય પર આઉટ થઈને ચોથા ક્રમે આવે છે. હરભજન સિંહે ભારત માટે નીચલા ક્રમે કેટલીક ઉપયોગી ઇનિંગ્સ રમી હતી અને તેમના નામે ટેસ્ટ ક્રિકેટમાં બે સદી પણ નોંધાયેલી છે, પરંતુ અસંગત બેટિંગને કારણે તેઓ ૩૭ વાર ખાતું ખોલાવવામાં નિષ્ફળ રહ્યા હતા.

છેલ્લા ક્રમે ભારતના સૌથી સફળ લેગ સ્પિનર અનિલ કુંબલે ૩૫ વખત શૂન્ય પર આઉટ થવાની યાદીમાં પાંચમા ક્રમે આવે છે. ટેસ્ટમાં એક જ ઇનિંગ્સમાં ૧૦ વિકેટ ઝડપવાનો ઐતિહાસિક રેકોર્ડ ધરાવતા કુંબલેએ ભારત માટે ટેસ્ટમાં ૧ સદી પણ ફટકારી છે, છતાં આંતરરાષ્ટ્રીય સ્તરે ૩૫ વાર ડક પર આઉટ થયા છે. આ આંકડા દર્શાવે છે કે રમતમાં શૂન્ય પર આઉટ થવું ગમે તેટલું નિરાશાજનક હોય પરંતુ આ દિગ્ગજોનું યોગદાન તેનાથી ક્યાંય વિશેષ છે.