Gujarati News

ભાવનગર તા. ૨૬ : બોટાદ જિલ્લાના રોજીદ ગામના કથિત લઠ્ઠાકાંડમાં ૫ ના મોત થતા આજે સવારે એક સાથે ૫ મૃતકોની ટ્રેકટરમાં અંતિમયાત્રા નીકળતા ગામ હિબકે ચડયું હતું.

ગઈકાલે લઠ્ઠાકાંડની ઘટના બાદ રાતથી જ રોજિદ સહિત આસપાસના ગામોમાં મહિલા અને બાળકોના રડવાનાં આક્રંદથી સમ્રગ ગામ દ્રવી ઉઠ્‍યું હતું. આજે વહેલી સવારથી જ એકસાથે ૫-૫ મૃતદેહોની ટ્રેક્‍ટરમાં અંતિમયાત્રા નીકળી રહી છે. ગઈકાલ સાંજથી અત્‍યાર સુધીમાં ઝેરી દારૂ પીવાથી મોતને ભેટનાર લોકોનો આંકડો ૨૪ એ પહોંચ્‍યો છે. જેમાંથી ૧૫ લોકો બરવાળા અને ૯ લોકો ધંધૂકાના રહેવાસી હોવાનું જાણવા મળ્‍યું છે. હાલ, મોડી રાતથી જ રોજિદ ગામમાં એટીએસ સહિતનો પોલીસનો કાફલો દોડી આવ્‍યો હતો.

હાલ કેટલાક દર્દીઓને ગંભીર હાલતમાં સારવાર અર્થે ભાવનગરની સર ટી હોસ્‍પિટલમાં તો કેટલાકને બોટાદ ખાતે દાખલ કરવામાં આવ્‍યા હતા. આ બનાવને પગલે દારૂ બનાવનારા અને દારૂ વેચનારાની પોલીસે તાત્‍કાલિક ધરપકડ કરી હતી.