Gujarati News

Gujarati News

News of Monday, 17th May 2021

પરિણીતાને બીભત્સ વીડિયો મોકલનાર શખ્સની ધરપકડ

પરિણાતીની ફરિયાદ બાદ પોલીસની કાર્યવાહી : આરોપી સિક્યુરિટી ગાર્ડ હતો ત્યાં એન્ટ્રી લેતા મહિલાએ વિગતમાં નંબર લખ્યો હતો, જે નંબર લઇ હેરાન કરતો હતો

અમદાવાદ, તા.૧૬ :શહેરના પોશ વિસ્તારમાં રહેતી પરિણીતાને ટ્રૂ કોલર એપ્લિકેશન અને વોટ્સએપમાં મેસેજ કરી હેરાન પરેશાન કરતાં મહિલાએ સાયબર ક્રાઈમમાં ફરિયાદ નોંધાવી છે. અજાણ્યા નંબર ઉપરથી પુરુષ તથા સ્ત્રીના જાતીય અંગોના વીડિયો અને ફોટા મોકલ્યા હતા. સાયબર ક્રાઈમ બ્રાન્ચે આરોપી સિક્યુરિટી ગાર્ડની ધરપકડ કરી છે. પરિણીતા એક ફ્લેટમાં ગઈ ત્યારે તેણે ફ્લેટના એન્ટ્રી ગેટ પર પોતાની વિગતો ભરી હતી. મહિલા સ્વરૂપવાન હોવાથી સિક્યુરિટી ગાર્ડને પસંદ આવી અને તેનો નંબર લઈ મેસેજ કરી બીભત્સ ક્લિપ મોકલવાની શરૂ કરી હતી. આવી અનેક મહિલાઓને મેસેજ કર્યા હતા.

શહેરના ઇસ્કોન આંબલી રોડ પર રહેતી ૨૭ વર્ષીય પરિણીતા તેના પતિ તથા બીજા સભ્યો સાથે ત્રણ વર્ષથી રહે છે. આ મહિલાનો પતિ કેમિકલ ડાઈનો વટવા જીઆઈડીસી ખાતે ફેક્ટરી ધરાવી વેપાર કરે છે અને મહિલાને સંતાનમાં બે વર્ષનો દીકરો પણ છે. સોશિયલ મીડિયા ઉપર બધાના સંપર્કમાં રહેવા માટે આ મહિલા વોટ્સએપ, ફેસબુક જેવી જુદીજુદી એપ્લિકેશનનો ઉપયોગ કરે છે. ગત ૨૮ ફેબ્રુઆરીના રોજ આ મહિલાને અજાણ્યા નંબર ઉપરથી ટ્રૂ કોલર એપ્લિકેશનની ચેટમાં પહેલા એક થમ્બ ઈમોજીવાળો મેસેજ આવ્યો હતો. પરંતુ આ નંબરથી તે અજાણ હોવાથી મહિલાએ તે મેસેજ ઉપર કોઈ ધ્યાન આપ્યું ન હતું.

ફરીથી બે માર્ચના રોજ આ મહિલા ઘરે હાજર હતી ત્યારે અજાણ્યા નંબરના ધારકે ફરીથી મહિલાને ટ્રૂ કોલર એપ્લિકેશનની ચેટમાં અશ્લીલ પ્રકારના વીડિયો તેમજ ગંદા ફોટા મોકલી ઁૈ લખી મેસેજ કર્યો હતો. આ મહિલા તે નંબરના ધારકને ઓળખતી ન હોવાથી મહિલાએ કોઈ રિપ્લાય આપ્યો ન હતો. બાદમાં ફરીથી ૨૪ માર્ચ ના રોજ મહિલાને ટ્રૂ કોલર એપ્લિકેશનની ચેટમાં તથા વોટ્સએપ ઉપર અજાણ્યા નંબર પરથી અશ્લીલ પ્રકારના વીડિયો તેમજ ગંદા ફોટા આવ્યા હતા અને તેમાં *હાઈ ઓનલાઇન આવો દોસ્ત* એવું લખાણ મોકલી આપ્યું હતું. જેથી મહિલાને એવું લાગ્યું હતું કે તેને કોઈ હેરાન કરવા માટે થઈ અલગ-અલગ મેસેજ કરી રહ્યું છે.

જેથી મહિલાએ આ નંબર બ્લોક કરી તેના પતિને જાણ કરી હતી. બાદમાં ૧૩ માર્ચના રોજ પણ ટેક્સ્ટ મેસેજ આવ્યા હતા. જેમાં આ મેસેજ કરનાર રોઝ અને દીલ આકારનું ઈમોજી મોકલતો હતો. એટલું જ નહીં અન્ય નંબર ઉપરથી આવેલા ટેક્સ મેસેજમાં *હાઉ આર યુ ટ્રૂ કોલર ક્યુ બંધ કિયા ચાલુ કરોના પ્લીઝ* તેવો મેસેજ કર્યો હતો આ રીતે મહિલાને જુદા જુદા મોબાઈલ નંબરથી ટ્રૂ કોલર તથા વોટ્સએપ ઉપર બીભત્સ પ્રકારના શારીરિક સંબંધો બાંધતા અને સ્ત્રી-પુરુષના જાતીય અંગ દેખાડતા વીડિયો અને ફોટા મોકલી શખસે હેરાન કરતાં આ મહિલાએ સાયબર ક્રાઇમમાં અરજી આપી હતી. જેથી સાયબર ક્રાઈમે અલગ-અલગ ત્રણ નંબર ઉપરથી મેસેજ કરનાર વ્યક્તિ સામે ગુનો નોંધી આરોપી પુષ્કરરામ આર્યાની ધરપકડ કરી છે. આરોપીની પૂછપરછમાં સામે આવ્યું કે આરોપી સેટેલાઇટમાં આવેલા અર્ચન રેસિડેન્સીમાં નોકરી કરે છે. આરોપીના લગ્ન ન થયા હોવાથી તેને છોકરીઓ સાથે મિત્રતા કરવાની ગમતી હતી. જેથી ફેસબુક પર અલગ અલગ ગમતી છોકરીઓને તે મેસેજો કરતો હતો. આ દરમિયાન ફરિયાદી મહિલા આ ફ્લેટમાં આવી ત્યારે આ આરોપીને તે ગમી ગઈ હતી અને તેણે રજિસ્ટરમાં આપેલો નમ્બર મેળવી મહિલાને ટ્રૂ કોલર અને વોટ્સએપ પર મેસેજો કરી બીભત્સ વીડિયો ફોટો મોકલ્યા હતા.

(9:31 pm IST)