Gujarati News

પાલનપુર, તા.૧૯ : પાટણમાં રહેતા કેટલાંક મિત્રો માઉન્ટ આબુ ખાતે મિત્રની બર્થડે પાર્ટી કરવા માટે ગયા હતા. બર્થડે પાર્ટી કરીને રિટર્ન ફરતી વખતે તેઓ પાલનપુરમાં આવેલા આર્કેડ કોમ્પલેક્સમાં ફ્રેશ થવા માટે રોકાયા હતા. આ દરમિયાન કોમ્પલેક્સના બીજા માળની ગેલેરીમાં આવેલી લોખંડની ગ્રીલ પર એક મિત્ર બેસ્યો હતો. ત્યારે બીજો મિત્ર આવીને મસ્તીમાં તેને બાથમાં લેવાનો પ્રયાસ કરવા જતા બંને નીચે પટકાયા હતા. નીચે પટાકાયા બાદ બંને મિત્રોને ગંભીર ઈજાઓ પહોંચી હતી. જે બાદ તાત્કાલિક સારવાર માટે તેઓને હોસ્પિટલમાં ખસેડવામાં આવ્યા હતા. જ્યાં સારવાર દરમિયાન એક મિત્રનું મોત થયું હતું. જે બાદ તેના મૃતદેહને પોસ્ટમોર્ટમ માટે સિવિલમાં ખસેડવામાં આવ્યો હતો.

પ્રાપ્ત વિગતો મુજબ, પાટણમાં રહેતા ચાર મિત્રો બર્થડે ઉજવવા માટે માઉન્ટ આબુ ગયા હતા. આબુથી પરત ફરતી વખતે ફ્રેશ થવા માટે આ મિત્રો પાલનપુર ખાતે રોકાયા હતા. ત્યારે પાલનપુરમાં આવેલા આર્કેડ કોમ્પલેક્સના બીજા માળે ગયા હતા. આ દરમિયાન એક મિત્ર બીજા માળે લગાવવામાં આવેલી લોખંડની ગ્રીલ પર બેસેલો હતો. ત્યારે બીજો મિત્ર આવ્યો અને મસ્તીમાં તેને બાથમાં લેવાનો પ્રયાસ કર્યો હતો. ત્યારે ગ્રીલ પરથી હાથ છટકી જતા બંને મિત્રો બીજા માળેથી નીચે પટકાયા હતા. જે બાદ બંને મિત્રો ગંભીર રીતે ઈજાગ્રસ્ત થયા હતા.

બાદમાં બંને મિત્રોને તાત્કાલિક પાલનપુરની એક ખાનગી હોસ્પિટલમાં સારવાર માટે લઈ જવામાં આવ્યા હતા. જ્યાં સારવાર દરમિયાન હાર્દિકભાઈ રમેશભાઈ ઠક્કરનું સારવાર દરમિયાન મોત થયુ હતુ. જે બાદ તેના મૃતદેહને પાલનપુરની સિવિલ હોસ્પિટલમાં પોસ્ટમોર્ટમ માટે લાવવામાં આવ્યો હતો. જ્યારે ગંભીર રીતે ઈજાગ્રસ્ત અન્ય મિત્ર નિકેશ દેસાઈ હાલ સારવાર હેઠળ છે. મહત્વનું છે કે, પાટણમાં રેડીમેડ કપડાંનો વ્યવસાય કરતો હાર્દિક ઠક્કર મિત્રો સાથે માઉન્ટ આબુ ખાતે બર્થડે ઉજવવા માટે ગયો હતો. માઉન્ટ આબુ ખાતે બર્થડે ઉજવીને પરત ફરતી વખતે તેઓ પાલનપુરના એક કોમ્પલેક્સમાં ફ્રેશ થવા માટે રોકાયા ત્યારે આ કરુણાંતિકા સર્જાઈ હતી. જે બાદ હાર્દિક ઠક્કરનું મોત નીપજ્યું હતું. દીકરાના મોત બાદ પરિવારમાં પણ માતમ છવાયો હતો. બનાવની જાણ થતા પરિવારજનો હોસ્પિટલ પહોંચ્યા હતા. પોલીસે પણ પરિવારના નિવેદન નોંધીને આગળની કાર્યવાહી હાથ ધરી છે.