Gujarati News

Gujarati News

News of Friday, 22nd January 2021

રૈયા રોડ અન્ડર બ્રિજ ખુલતાની સાથે અણધડ વ્યવસ્થાને કારણે હાલાકી વધીઃ રૈયા તરફથી આવતો રસ્તો કિસાનપરા ચોકમાં બંધ

રૈયા રોડથી ડિવાઇડર ન બને ત્યાં સુધી ટેમ્પરરી બેરીકેડ મુકવામાં આવીઃ કોર્પોરેશનના ટેકનીકલ અધિકારીઓ સાથે ચર્ચા વિચારણા બાદ એકાદ દિવસમાં યોગ્ય વ્યવસ્થા ગોઠવાઇઃ એસીપી બી. એ. ચાવડાનો ખુલાસો

રાજકોટઃ રૈયા રોડ અન્ડર બ્રિજના લોકાર્પણ સાથે જ કિસાનપરા ચોકમાં ડિવાઇડરની અણધડ વ્યવસ્થા ગોઠવાતા રૈયા રોડ તરફથી જીલ્લા પંચાયત 'અકિલા ચોક' તરફ આવતાં વાહન ચાલકોને આજે હાલાકીનો સામનો કરવો પડ્યો છે. આ બાબતે ફરિયાદોનો ધોધ વરસ્યો છે. છેલ્લા લાંબા સમયથી રૈયા રોડ રેલ્વે ક્રોસીંગ નીચે અન્ડર બ્રિજ બનાવવાનું કામ ચાલુ હતું તેને લઇને રૈયા રોડ તરફથી આવતાં અને જતાં હજારો વાહન ચાલકોને મહિલા કોલેજ અન્ડર બ્રિજ તરફથી અથવા તો એરપોર્ટ રોડ ફાટકવાળા રસ્તેથી આવવુ જવું પડતું હતું. ગઇકાલે બ્રિજના લોકાર્પણ સાથે તેમની હાલાકીનો અંત આવ્યો હતો. પરંતુ આજે બપોરથી ટ્રાફિક પોલીસ અને મ્યુનિસિપલ તંત્ર દ્વારા કિસાનપરા ચોકમાં બાલભવન તરફ જતાં ડિવાઇડર બંધ કરવાની કામગીરી પુર્વે હંગામી ધોરણે ટ્રાફિકની બેરીકેડ ગોઠવી દઇ મુખ્ય રસ્તો જ બંધ કરી દેવામાં આવ્યો હતો. આ કારણે રૈયા રોડ તરફથી આવતા વાહન ચાલકોને જમણી બાજુ ટર્ન લઇ મેયર બંગલા સામેના રસ્તે યુ-ટર્ન લઇ જીલ્લા પંચાયત ચોક તરફ જવાની ફરજ પડતી હોવાથી અકારણનો ધરમધક્કો થતો હોવાની અખબારો પર ફરિયાદોનો ધોધ થયો હતો. આ બારામાં એસીપી ટ્રાફિક શ્રી બી. એ. ચાવડાનો સંપર્ક સાધતાં તેમણે કહ્યું હતું કે આ વ્યવસ્થા કિસાનપરા ચોકમાં હંગામી રીતે સર્જાયેલા ટ્રાફિક જામને નીવારવા ગોઠવ્યાનો અને આવતા દિવસોમાં મ્યુનિસિપલ કોર્પોરેશનના ટેકનીકલ સ્ટાફ સાથે સ્થળ વિઝીટ બાદ બાલભવન તરફ જતાં ડિવાઇડર બંધ થયા બાદ મુખ્ય રસ્તો પુનઃ ખુલ્લો મુકી દેવામાં આવશે. તેવો ખુલાસો કર્યો હતો. તસ્વીરમાં રૈયા રોડ તરફથી આવતાં વાહન ચાલકો માટે જીલ્લા પંચાયત તરફ જવાનો રસ્તો બંધ કરવા ગોઠવાયેલી બેરીકેટ નજરે પડે છે. (ફોટોઃ સંદિપ બગથરીયા)

(3:36 pm IST)
  • દેશમાં કોરોના થાક્યો:નવા કેસ કરતા સ્વસ્થ થનારની સંખ્યામાં વધારો : એક્ટિવ કેસના આંકમાં સતત ઘટાડો : રાત્રે 11-30 વાગ્યા સુધીમાં કોરોનાના નવા 14,246 કેસ નોંધાયા :કુલ કેસની સંખ્યા 1,06,40,669 થઇ :એક્ટિવ કેસ 1,82,891 થયા: વધુ 17,034 દર્દીઓ સ્વસ્થ થતા કુલ 1,02,99,931 થયા :વધુ 151 લોકોના મોત સાથે કુલ મૃત્યુઆંક 1,53,218 થયા access_time 1:07 am IST

  • રામ મંદિર નિર્માણ માટે વિજયભાઈએ ૫ લાખ અને રામભાઈ મોકરિયાએ ૧૧ લાખ જાહેર કર્યા: મુખ્યમંત્રી વિજયભાઈ રૂપાણીએ આજે રાજકોટ ખાતે શ્રેષ્ઠઈઓની બેઠકમાં અયોધ્યામાં રામ મંદિર નિર્માણ માટે પાંચ લાખ રૂપિયાના દાનની જાહેરાત કરી છે, જ્યારે મારુતિ કુરિયર પ્રાઇવેટ લિમિટેડના શ્રી રામભાઈ મોકરિયાએ રામ મંદિર નિર્માણ માટે ૧૧ લાખ રૂપિયાની જાહેરાત કરી હતી. access_time 12:19 am IST

  • પૂર્વ ધારાસભ્ય ભૂપેન્દ્ર ખાંટનું દુઃખદ અવસાન: ગાંધીનગર: મોરવા હડફના પૂર્વ ધારાસભ્ય ભૂપેન્દ્ર ખાંટનું લાંબી માંદગી બાદ દુઃખદ અવસાન થયું છે access_time 11:43 am IST