Gujarati News

નવી દિલ્હી, તા. ૨૭ : જમ્મુ-કાશ્મીરમાં હવે દેશનો કોઈ પણ વ્યક્તિ જમીન ખરીદી શકે છે અને ત્યાં વસી પણ શકે છે. ગૃહ મંત્રાલય દ્વારા મંગળવારના રોજ આ અંતર્ગત નવી નોટિફિકેશન જાહેર કરવામાં આવી છે. જોકે, હજી સુધી ખેતી માટેની જમીન મામલે પ્રતિબંધ યથાવત્ છે.

જમ્મુ-કાશ્મીરના ઉપરાજ્યપાલ મનોજ સિન્હાએ કહ્યું કે, અમે ઈચ્છીએ છીએ કે બહારની ઈન્ડસ્ટ્રીઝ જમ્મુ-કાશ્મીરમાં આવીને સ્થપાય, તેથી ઈન્ડસ્ટ્રિયલ લેન્ડમાં ઈન્વેસ્ટ કરવાની જરૂર છે. પરંતુ ખેતીની જમીન ફક્ત રાજ્યના લોકો માટે જ મર્યાદિત રહેશે.

નોંધનીય છે કે આ અગાઉ જમ્મુ-કાશ્મીરમાં ફક્ત ત્યાંના સ્થાનીક લોકો જ જમીનની ખરીદ-વેચાણ કરી શકતા હતા. પરંતુ હવે જમ્મુ-કાશ્મીરની બહારથી આવતા લોકો પણ જમીન ખરીદીને ત્યાં પોતાનું કામ શરૂ કરી શકશે.

કેન્દ્રીય ગૃહ મંત્રાલયે આ નિર્ણય જમ્મુ-કાશ્મીર પુનર્ગઠન કાયદા અંતર્ગત લીધો છે. જેના પ્રણાણે હવે કોઈ પણ ભારતીય જમ્મુ-કાશ્મીરમાં ઘર, દુકાન અથવા જમીન ખરીદી શકશે તેમજ ફેક્ટરી પણ શરૂ કરી શકશે. આ માટે કોઈ પણ પ્રકારના સ્ખાનીક રહેવાસી હોવાના પુરાવાઓ આપવાની જરૂર નહીં પડે.

નોંધનીય છે કે જમ્મુ-કાશ્મીરને ગયા વર્ષે જ કલમ ૩૭૦માંથી મુક્ત કરી દેવાયું હતું. ત્યારબાદ ૩૧ ઓક્ટોબર ૨૦૧૯ના રોજ જમ્મુ-કાશ્મીર કેન્દ્ર શાસિત પ્રદેશ બની ગયું હતું. હવે કેન્દ્ર શાસિત પ્રદેશ તરીકે એક વર્ષ પૂર્ણ થવા જઈ રહ્યું છે ત્યારે જમીનના કાયદામાં પણ ફેરફાર કરવામાં આવ્યો છે.